新柏金Show Time 廠仔秒殺西布朗

猪拉多纳

奧斯爾在陣隊友升呢50%

柏金歸位撐起兵工廠？講緊嘅唔係荷蘭名宿柏金，而係「德版柏金」奧斯爾！呢位大眼仔今季登陸英超之後大放異彩，阿仙奴最近贏到開巷佢有好大功勞，就連兵工廠名將伊恩胡禮都封佢做「新柏金」。今晚奧斯爾率領阿仙奴造訪西布朗，只要貫徹今季嘅「快打旋風」嘅踢法，西布朗邊係佢哋手腳吖？作客讓半一梗係捧上盤啦！

（now622台周日晚11:00直播）
廠仔沙格拿傷腿筋抖3周

英超贊助商巴克萊前晚正式推出「巴克萊巴士」，未來3季會為部分客隊球迷提供免費接送服務，有份出席呢項活動嘅阿仙奴名宿伊恩胡禮受訪時大讚奧斯爾：「奧斯爾嘅影響力同魅力似足柏金，有呢啲級數嘅球員在場嘅話，隊友嘅表現起碼提升40至50%！」姑勿論奧斯爾第日嘅成就追唔追得上柏金，佢加盟阿仙奴之後嘅表現又真係冇得彈。

睇番數據，奧斯爾為阿仙奴披甲5場已經貢獻1個入球兼4次助攻，今晚有佢穿針引線餵波畀近期弗爆嘅艾朗藍斯同基奧特，由莊拿斯奧臣等烏合之眾領銜嘅西布朗防線邊頂得住吖？雖然阿仙奴右閘沙格拿整傷腿筋要抖3個禮拜，但查實贊堅臣今季表現成熟咗好多，有佢頂沙格拿個位，預計影響唔大。最重要係阿仙奴今季好興嘭嘭聲入波，今季英超開波頭15分鐘已經有4球進帳，西布朗一個唔留神，場波隨時晨早就擺入雪櫃。
西布朗前鋒冼佳亞打柴

雙方上月底先至喺英聯盃第3圈交手，當時主場嘅西布朗面對幾乎全副選嘅廠仔都冇甜頭，最終互射12碼輸埋出局，今仗佢哋除咗繼續有門將賓科士打養傷，仲有前鋒史葛冼佳亞做埋十字軍，想阻阿仙奴贏波創球會最長客場連贏紀錄（目前已連贏8場）？睇怕冇乜可能咯！
Data King 西布朗下半場多入波

‧阿仙奴係今季英超開波頭15分鐘「入球王」（4球）。

‧西布朗開季至今攻入6球，當中5球喺嚟自下半場。

‧兵工廠今季6場英超都先開紀錄。
乜都玩錦囊 阿仙奴先發制人博「第一隊入球」

阿仙奴今季場場都先發制人，6場英超都係先開紀錄嗰隊，撞啱超過8成嘅西布朗入球都係嚟自下半場，睇怕1.48倍嘅阿仙奴「第一隊入球」都走唔甩！