13個球員孭黃牌 烏拉圭踢守「細」波

猪拉多纳

今日場世界盃外圍賽南美洲區大戰─烏拉圭主場對阿根廷，表面烏拉圭贏波仲有機會直接出線，其實呢個只係假象，呢場完全失去競賽意義嘅例行公事，真係任佢開邊瓣都得，同買大細冇乜分別，就咁博1.92倍入球細算嘞。

（開賽時間：周三早上7:30）

大家睇睇南美洲區個積分榜就知，今場波真係唔踢都冇所謂，阿根廷已經首名出線，烏拉圭呢？第5位打風都打唔甩，肯定可以踢附加賽對亞洲區第5名嘅約旦，爭搭巴西決賽周尾班車。無疑從數字上去講，烏拉圭只係少第3、4位嘅厄瓜多爾同智利3分，似乎有得追，不過非常不幸嘅係，厄瓜多爾壓軸戰就係對智利，佢兩隊打和各得1分已經搞掂，烏拉圭贏到阿根廷都冇得直接出線，足智彩都唔敢開場「厄、智對戰」，你仲唔明？
阿根廷二線兵孭飛

正因為咁，烏拉圭、阿根廷兩隊都各有如意算盤。阿根廷嗰邊冇嘢好搏，主帥沙貝拉講到明玩輪換，唔單美斯、希古恩幾個養傷，今場連阿古路、上場做隊長嘅迪馬利亞都收起埋，由首次擔正嘅莫路伊卡迪帶住班邊緣國腳Show Off吓。主隊烏拉圭都一樣，佢哋嘅心思已經去咗備戰約旦，由於上場輸畀厄瓜多爾0:1嗰陣好火得滯，烏拉圭家陣有13個球員孭住黃牌，今日對阿根廷再食牛肉乾就唔打得附加賽，想唔就住都唔得。既然大家個心都唔响場波度，少少哋玩個入球細算數。
世盃外南美洲區