傳雲格續約兵工廠兩年

猪拉多纳

英超一哥阿仙奴主場迎戰諾域治，賽前好事連連，當地傳媒報道，雲格已經同意與「兵工廠」續約兩年，年薪高達750萬鎊，而雲格喺球會周年大會中指出，周中國際賽被踢傷嘅奧斯爾，原則上傷勢無大礙，只要軍醫check清楚，今戰可以上陣搏殺，佢又豪言球隊個頭開得靚，絕對有能力拿下英超冠軍。講到咁，冇理由主場對弱旅失分啩，半場就KO諾域治啦，捧半場主勝。
半場搞得掂諾域治

「兵工廠」下周要出戰歐聯，為免夜長夢多，早早解決弱旅，下半場畀主力休息最好，事實上，今季阿仙奴聯賽七戰有四仗喺頭15分鐘就取得入球。球隊入局快，奧斯爾居功至偉，呢名德國中場今仗應可出戰，戰鬥力冇影響，半場搞掂諾域治。