金童倒戈講明冇面畀 皇馬發奮做贏「加」

猪拉多纳

經過一星期嘅國際賽後，皇馬今晚喺西甲再度出擊，主場擺擂台迎戰馬拉加。皇馬暫時落後巴塞同馬體會5分，話就話聯賽漫漫長路仲可以追，但如果自己再唔生性，人哋失分都冇用啦！馬拉加財困人所皆知，上季班底走得八八九九，今鋪好大機會抬蛋，皇馬「-2」照追1.65倍「讓主」。

（now632台周六晚10:00直播）

皇馬賽前收到好消息，加里夫巴利早幾日已經復操，今仗有望上陣，不過今晚嘅焦點，始終係倒戈嘅艾斯高，呢位「金童」加盟後短時間內已獲球迷認同，賽前佢亦講明即使對住母會都唔會手軟，反而仲想展示自己嘅進步添，戰意夠晒高昂。季初傳出離隊嘅迪馬利亞，喺復任正選後亦不斷交出士哥同助攻，加埋「入球機器」C朗，皇馬嘅鋒力絕對可以用恐怖嚟形容。
馬拉加面目全非等劏

講到防線，皇馬一樣咁掂。「艦隊新門神」迪亞高洛迪古斯，係張峰好欣賞嘅球員，佢搶走咗卡斯拿斯個正選位，喺西班牙承受唔小壓力，「聖卡斯」尋日仲公開表示，如果3個月內都仲係做後備，就會選擇離開皇馬，但迪亞高洛迪古斯每次上陣都有出色表現，有佢把關，皇馬條防線穩陣咗好多，呢個「幸福的煩惱」，都係交畀安察洛堤去解決啦！

馬拉加喺比歷連尼、艾斯高、祖亞昆同迪米捷利斯等將帥走人後，今季戰績係8戰2勝3和3負，同上季打入歐聯8強嗰隊馬拉加差好遠，睇埋佢哋上仗主場鬥奧沙辛拿都要輸0:1，就知呢班波真係等死格局。