祖記迷失紫百合

猪拉多纳

銅牆倒塌難擋費倫尖刀

今晚又有意甲好戲碼上演，「紫百合」費倫天拿主場對祖雲達斯，牌面上祖記無疑勝一籌，但其實佢哋防線穩定性大不如前，7場聯賽僅兩仗冇失波，遇上重生嘅費倫射手基奧斯比羅斯，保方好難保住後方。唔好忘記祖雲達斯仲有歐聯後顧，提防留有一手，客Ｗ2.05倍熱唔透，讓波靠唔住，力撐費倫天拿讓球主勝。

（TVB 13及now 818周日晚9時直播）

祖雲達斯聯賽7戰6勝1和，表面上保持水準，但有5場勝仗都只淨贏1球，唔太夠說服力，後防更由以往銅牆鐵壁變成「豆腐渣」，對住弱隊維羅納、基爾禾都要失波，而鋒線上無論派泰維斯、基奧雲高、洛蘭迪或加利亞雷拉上陣都未如理想，好多時要靠維達爾及保羅普巴等中場後上數胡。

最令人擔心係祖記喺周中歐聯作客惡鬥皇馬，佢哋首兩場分組賽都和波，如果呢場又失分，出線前景肯定暗淡，教練干地權衡輕重下，今仗隨時會收起部分主力，尤其係派路、邦路斯及保羅普巴等剛踢完國際賽，連場惡鬥對體力需求極大。
羅斯仔翻生入球停不了

「紫百合」今季最大亮點必定係基奧斯比羅斯，呢位「玻璃腳」終於擺脫傷患魔爪，頻頻入波，已有5球進帳。球隊有佢喺前線搵食，可以專心踢穩守突擊。事實上，費倫近6次主場對祖記，有4次可保不敗，更何況對方分心歐聯，費倫仲唔趁機搶分咩。