車仔撞爆史浩克

猪拉多纳

莫連奴趁對手殘陣挽面子

歐聯E組上演雙藍大戰，德甲藍軍史浩克04主場迎戰英超藍戰士車路士，車路士分組賽首戰落筆打三更不敵瑞士巴素利，出線形勢凶險，今晚作客面對E組一哥史浩克不容有失，遇着史浩克陣容超殘，攻不銳守不穩，車路士有力作客全取三分搶佔榜首，客軍小讓平半，黑柴捧上盤。

（有線62及202台周三凌晨2時45分直播）

The Special One莫連奴今季重返車路士開始得並唔順利，九月中歐聯分組賽第一擊就喺主場輸畀巴素利，但莫帥始終係猛料之人，經此一役後球隊迅速糾正問題，及後於三線作戰保持6戰5勝1和佳績，於英超進佔次席，球隊啱啱喺聯賽大炒卡迪夫城4比1，新加盟嘅箭頭伊度奧終於開齋成為球隊贏波英雄，今晚到訪史浩克打關鍵戰絕對信心十足。
史軍防線豆腐渣

史浩克演出向來反覆，原因係觀音頭掃把腳，中前場擁有多名世界級星，但防線就水到冇朋友，聯賽踢咗9輪失咗19球，成條防線得個賀維迪斯較可靠，雖然近期得到艾奧高來投，但始終搵唔到一個可靠中堅，右閘內田篤人攻優於守，根本唔係正宗防守球員，面對大勇嘅夏薩特好難頂。

史浩克今仗仲面對嚴重傷兵問題，進攻命脈法芬仍然養傷，箭頭亨特拉爾舊傷復發隨時要抖到明年，近日連新加盟既主力中場奇雲保定都受膝傷困擾，加上兩名防守鍾斯同馬高賀查亦上陣成疑，中前場戰鬥力嚴重削弱，連個「觀音頭」都亂埋，根本冇本錢抵禦背城借一嘅車仔狂攻，何況兩軍教頭級數差距太遠，史浩克既贊斯基拿臨場調動出名鈍，仲要終日為飯碗擔心，面對頂級名帥莫連奴，喺主帥一環已經輸晒了。