皇馬新魯爾上位騷

猪拉多纳

祖記穿窿 莫拉達嗒糖

今晚歐聯B組爆發矚目大戰，西甲豪門皇家馬德里主場火併意甲班霸祖雲達斯。一直視魯爾為偶像嘅皇馬新星艾華路莫拉達，近日趁住隊友賓施馬冇料到獲重用；17年前魯爾正係憑住擊敗祖記一舉成名，撞啱「斑馬兵團」愈踢愈曳，呢位「新魯爾」為重演偶像上位軌迹必定搏盡，主W不容錯過。

（有線61及201台周四凌晨2時45分直播）

正所謂初生之犢不畏虎，1996年歐聯八強首回合，年僅19歲嘅魯爾面對強敵祖雲達斯毫無懼色，並一箭定江山協助皇馬搶得先機，自此名揚天下，不但榮登西班牙足球icon人物，亦成為好多「小狂牛」心目中嘅偶像，艾華路莫拉達就係其中之一。呢位皇馬青訓產品因入球效率高，贏得「新魯爾」稱號，適逢法國前鋒賓施馬今季陷於低潮，畀粉絲噓到冇晒信心，教頭安察洛堤亦開始畀機會莫拉達，之前對利雲特有士哥，上仗對馬拉加更代替「賓施貓」擔正表現唔錯，有傳莫拉達今仗會正選披甲，必定趁機入番粒博上位，複製魯爾成功之路。
巴利復出交足貨

除咗莫拉達之外，另一焦點加里夫巴利傷愈復出交足貨，上仗後備落場表現活躍，末段更博到12碼，證明呢位天價飛翼逐漸融入球隊。相反，祖雲達斯開季演出差強人意，贏波總係拖泥帶水，毫無霸氣，連一向予人穩陣嘅防線亦甩漏多多，後衞基亞連尼、巴沙利、邦路斯跌晒Watt，上仗作客費倫天拿喺領先兩粒之下，竟然畀對手連轟四球反勝，嚴重打擊士氣，攻不銳守不堅嘅「斑馬兵團」，點頂得住弗到爆嘅C朗、加里夫巴利、莫拉達、艾斯高嘅連番衝擊呀？主W實乃不二之選。