皇馬祖記巨星「大」匯演

猪拉多纳

2戰入10球 Vs 分組賽專家

歐聯今晚有場超重量級賽事，皇家馬德里同祖雲達斯呢兩隊加埋曾11次稱霸歐洲嘅班霸，將會喺馬德里巴拿貝進行星級「大」匯演！皇馬今季歐聯兩戰入10球，不過今晚面對嘅係「歐洲不敗王」祖記，未必有十足把握贏波，轉玩1.5倍入球大好過！

（有線61及201、中央5台周四凌晨2:45直播）
加里夫巴利隨時候命

加里夫巴利以天價加盟皇馬後一直傷多過踢，不過上場聯賽佢已經有落場，呢位威爾斯國腳今晚有望繼續披甲，即使後備都好，但正選件迪馬利亞查實一樣咁堅，有佢同C朗雙翼齊飛，鋒力當然靠得住啦！其實自從「大眼仔」奧斯爾走咗之後，「銀河艦隊」嘅進攻模式就更依賴個別巨星嘅單打獨鬥能力，C朗、迪馬利亞同加里夫巴利，正正就係可以單對單摧毀對方防線嘅球星！

睇番數據，皇馬喺歐聯連環炒加拉塔沙雷同哥本哈根，入球能力當然唔使懷疑，不過佢哋今場對手係意甲冠軍祖雲達斯，級數同之前兩隊完全唔同。「祖記」真係好得意，計埋今季開頭兩場波、前季歐霸盃同上季歐聯，呢3年14場歐洲賽事分組賽，佢哋總共和咗11場，其他3場贏晒！頭兩場分組賽佢哋都係同對手打和，所以皇馬即使有三大天王，但今晚對住「和波專家」，又點敢話贏硬？
加利亞雷拉打柴洛蘭迪頂上

係，祖記雖然有前鋒加利亞雷拉受傷，不過後備席上仲有加盟後未受重用嘅洛蘭迪，有佢拍住泰維斯，火力依然強勁；智利國腳維達爾據報今場傷愈復出，祖記嘅戰鬥力一啲都唔差o架！講真，皇馬同祖記分別係西甲同意甲嘅星級擂台躉，兩軍歷年交手，都係一眾巨星嘅Show Time，施丹、朗拿度、費拉拿、尼維特……等等，與其估邊隊贏，不如早早落注「入球大」，安心睇呢場「大」匯演好過啦！
Data King 艦隊食住斑馬兵

‧皇馬近10次主場比賽贏9場。

‧兩軍近5次喺巴拿貝球場交手，皇馬取得4勝1負。

‧祖雲達斯連續11場比賽有波入。
乜都玩錦囊 揸皇馬W做過關膽

祖雲達斯上場聯賽對費倫天拿先勝後敗，對士氣有一定打擊。查實佢哋條防線已經冇以前咁穩陣，近3戰共失8球，睇見都唔開胃。而且「斑馬軍」喺今屆歐聯表現失準，對住加拉塔沙雷同哥本哈根都贏唔到，今仗作客皇馬實在難以睇好。皇馬射手賓施馬雖陷入球荒，不過C朗同迪馬利亞狀態大勇，加上主帥安察洛堤歐聯經驗豐富，又熟悉意大利波嘅打法，1.44倍主勝最啱做過關膽！
歐聯B組

頂占筍盤：皇馬（入球大）