捧恩格斯大運財

猪拉多纳

　　睇睇目前騎師榜形勢，潘頓「的」起心肝，好似矢志爭冠軍咁款，快快手贏咗16場頭馬，目前居於首位，W多過韋達3場，排第三、四位分別係田泰安及杜利萊。後者今季初好似醒神咗，贏馬多咗，不過，依然戒唔甩轉直路彎經常掟到外父咁外。

　　齊齊騎足10場

　　講開潘頓與杜利萊，久唔久就會見到二人在同一期贏馬，係巧合又好，係因為潘頓贏馬特別多，所以有此錯覺都好，總之，近幾期已再三有同類事件發生，如果專捉騎師嘅馬友，可能搵到餐晏仔。今日潘頓騎足10場，杜利萊一樣係坐騎卜滿，話唔埋咁啱，又會齊齊贏馬。

　　先講潘頓坐騎，第七場「恩格斯」及第九場「得盛」，勝在穩健，磅係重啲，另外，頭場「明民天下」，一落五班，即刻用強手，唔再係近仗華將，睇配搭，似係陰啲陰啲出手。至於杜利萊，第一場「威祥」，演出係就係準，只不過已經連拼兩場，唔知會唔會冇第三劑。但佢尚有牌面馬「好好計」、「飛哥」及「大運財」，今日應該唔會空手回。(Jack)