拿玻里鋒力仲恐怖過上季

猪拉多纳

大家好，有一段日子冇同大家見面，除咗工作較忙，仲要為新居裝修同搬屋而奔波，依家搞掂晒，總算有個安樂窩喇。今日同大家傾吓一場由無綫體育台直播嘅意甲，拿玻里主埸迎戰拖連奴。

今季意甲已經進行咗8周賽事，拿玻里暫以6勝1和1負排喺積分榜次席，呢班波今季改由賓尼迪斯執教，佢既搵埋利物浦舊部門將連拿過嚟幫手，同時又向皇馬收購中堅艾比奧爾，大大提升拿坡里嘅防守力。進攻方面，雖然佢哋高價賣走咗首席射手卡雲尼，但頂替佢嘅前皇馬射手希古恩同荷西卡里祖，均已迅速融入隊波，開季至今合共取得7個入球，整體鋒力可謂有增無減。

作客嘅拖連奴亦非善男信女，今季更曾逼和「米蘭雙雄」，僅以1球不敵祖雲達斯，射手阿利斯奧施斯已取得5個入球，今仗佢同艾比奧爾嘅比併，絕對係賽事一大亮點。個人認為，今仗對拿玻里嚟講，絕對係一次嚴峻嘅考驗。