皇馬半場大啱胃口 西維爾送外賣 C朗舔脷

猪拉多纳

今晚續有西甲快車，皇家馬德里喺主場火併西維爾。雖然「銀河艦隊」啱啱喺國家打吡不敵巴塞，但過程不落下風，射手C朗亦逃過被追加停賽嘅處罰，真係大話夾好彩，即刻上載自己揸F1法拉利戰車嘅型仔相威番吓，適逢佢最鍾意嘅「私房菜」西維爾送上門，C朗仲唔心急搶住食咩？不過嗜攻嘅西維爾唔會坐以待斃，斯維認為半場大更加值博。

（now 632周四清晨5時直播）
爆粗鬧球證甩難

皇馬上仗國家打吡作客1比2輸畀巴塞，但比賽過程都算勢均力敵，C朗殺入禁區被馬斯真蘭奴踢跌未獲12碼，佢即時嬲到爆粗鬧球證：「你他X的懦夫！」結果只係食咗張黃牌，不過鬧球證嘅嘢可大可小，通常會被追加停賽，好彩球證冇將C朗嘅爆粗行為寫喺賽後報告，因此紀律委員會亦網開一面，佢冇被秋後算帳，總算鬆一口氣，即刻喺社交網instagram擺咗張佢揸F1法拉利紅色戰車嘅靚相，Chok男配辣車，真係型到冇朋友。
沙比阿朗素復操候命

睇番紀錄，C朗對親西維爾都分外Sharp醒，近5次對碰怒轟11粒，場均入成2.2球，仲試過一場食出大四喜添，證明佢都幾鍾意食呢盆「私房菜」，加上皇馬輸咗國家打吡急於補鑊，預計一開波即撳住嚟搶。

皇馬賽前仲收到個好消息，就係養傷多時嘅中場悍將沙比阿朗素，已跟大隊一齊操練，好大機會喺今仗後備入場輕舒步頭。至於對手西維爾喺主帥艾美利麾下攻強守弱，中前場嘅查路森巴利奧、卡路士巴卡、拿傑迪錫狀態都幾弗，作客巴拿貝絕對唔會坐以待斃，半場大有1.8倍咪嫌少呀！