派路騷哥利祖記玩殘卡坦

猪拉多纳

尋日公布嘅國際足協金球獎23人名單當中，意甲得番祖雲達斯中場派路一人入選，情況令人唏噓。但呢位意大利國腳爭勝心一向唔弱，為咗捍衞自己同意甲嘅尊嚴，今晚佢喺主場領軍迎戰「作客蟲」卡坦尼亞，肯定施展渾身解數，幫球隊大勝一場，1.46倍「讓球主勝」要支持。

（開賽時間：周四凌晨3:45）
卡坦尼亞作客4戰全敗

祖雲達斯上仗回勇，砌低熱拿亞終止2連敗。今仗對住實力一般嘅卡坦尼亞，仲唔趁機會搶足3分，兼入多幾粒收窄同其他前列球隊嘅得失球差咩？「斑馬軍團」一對前鋒胡仙歷、加利亞雷拉繼續養傷，不過前線由泰維斯同洛蘭迪掛帥，火力只會更得人驚，配合最近輪住入波嘅派路、保羅普巴、維達爾，贏2球相信係最低消費。

今季淨識喺主場搶分嘅卡坦尼亞，一作客就腳軟，4戰全敗仲失咗9球咁多。陣中最具威脅嘅中場柏保路巴列安圖斯未復出，尼高拉斯史普利、蒙遜等3名後衞又話唔踢得，連死守博1分嘅本錢都冇，睇怕佢哋今晚都要喺自己龍門執多幾次波出嚟嘞。