阿仙奴受讓多謝晒

猪拉多纳

高普撩交嗌 雲格實還拖

歐聯死亡F組爆發榜首大戰，榜首阿仙奴作客「蜜蜂竇」火併次席嘅多蒙特，兩軍與第3位嘅拿玻里同分，形勢非常緊湊。不過，多蒙特教頭高普賽前狂出口術，自言鍾意勁嘈嘅重金屬搖滾樂，嘲諷阿仙奴猶如靜到暈嘅管弦樂團，「廠長」雲格畀人咁寸法唔嬲勢係假，定必還以顏色，何況阿仙奴依家話晒係英超1哥，今仗有得受讓半一絕對超筍，下盤不容錯過。

（有線61及201台周四凌晨3時45分直播)
踩槍手踢法悶蛋

阿仙奴上仗主場意外地輸畀多蒙特，現與多軍及拿玻里同得6分，僅憑較佳對賽成績排榜首，分組賽只剩番3輪，稍有差池隨時出唔到線。賽前多蒙特教頭高普發表「撩交嗌」言論：「雲格冇錯係勁有才華，但佢擅於不斷傳波嘅控球打法，就好似管弦樂團，不過呢種音樂實在太靜喇！我鍾意嘈到爆嘅重金屬搖滾樂，更加激情四射。」咁講法即係擺明踩阿仙奴啲波悶，不過高普講埋啲咁嘢實在犯咗兵家大忌，因為咁隨時會收到反效果，就係激起一眾「槍手」嘅鬥心，累球隊陷入苦戰。

至於雲格今次就唔同高普鬥嘴，只係叫班球員唔好因為剛啱喺英超榜首大戰贏咗利物浦，依家喺榜首拋離5分就鬆毛鬆翼，而佢更講到明，喺攞到歐聯分組出線資格之前，唔會同球會傾續約，可見「教授」對爭出線非常有決心。
變陣復仇多蒙特

雖然阿仙奴仍有禾確特、阿歷士張伯倫同韋舒亞因傷倦勤，好彩西班牙中場辛迪卡索拉及時復出，拍住奧斯爾組成雙核，可以不斷交換位置，滿場飛組織進攻，加上「藍神」艾朗藍斯近況銳不可當，入球如麻，配合同樣腳風極順嘅大隻佬中鋒基奧特喺前線衝擊，勢必對多蒙特防線構成沉重壓力。

吸收過上仗被多蒙特全場緊迫，搞到自亂陣腳而輸波嘅教訓，相信雲格為報一敗之辱，今仗會改變戰術，一於以柔制剛，利用強大嘅控球打法，要班「蜜蜂仔」亂咁飛浪費氣力，睇準機會先作出致命一擊。多蒙特雖有地利，但呢組叫得死亡F組，球隊相互之間實力接近，主隊要讓半一實在過晒火位，故斯維認為下盤係不二之選。