鴻福滿滿換人博冷

猪拉多纳

　　執筆之時，外面雨下個不停，阿棟一向嘅作風，大家好清楚，谷草已經唔係主要錢博錢嘅場合，仲要整多幾陣雨，更加難上加難，奉勸想搏殺嘅馬迷今晚勒住嚟玩，正所謂，留得青山在嘛。

　　第六場三班1800米。「首飾多寶」繼續用莫雷拉，以阿蔡同佢近日合作嘅成績，一定會搏甩髀，唔使擔心會縮。隔晚睇過有3.5倍，仲喺可以接受範圍以內，如果臨場3倍及以下，我建議忍手，事關連搏兩場，體力唔係冇用過，有實力亦要合乎值博角度。

　　第七場三班1000米。「花月佳期」呢系馬係大摩核心支持者之一，唔會冇心裝載。不過，呢匹馬生性失準，久不久跑到影都冇。但轉到谷草，點都係有卡士，上季贏得「跑寶貝跑」，級數邊係呢批對手可比，如有10倍，博佢今場返嚟，值得一試。

　　第八場三班1650米。「鴻福滿滿」今季初出用頭罩、留後跑，再出跟得前咗啲，好有試馬味道，呢次又點呢？除頭罩及轉到谷中，阿良諗過諗度，應該唔會點錯。而呢匹馬前仗後上走勢露了光，證明狀態已在，呢次忽然換埋人，減低受注意程度，呢類有實力嘅冷門馬，唔買等幾時。

　　「鴻福滿滿」隔夜W有10倍、P4倍，以我嘅菠菜標準，1隻簡簡單單買WP夠晒數，唔使射呢隻串嗰隻。

　　(陳華棟 資深評馬人)