墨西哥冇「小豌豆」照o趙新西蘭

猪拉多纳

世盃附加賽首回合今晚開打，墨西哥先喺主場迎戰大洋洲冠軍新西蘭。喺中北美洲區全靠美國至攞到附加賽資格嘅墨西哥，遇着實力差一截嘅新西蘭，名副其實大難不死必有後福，教頭米基爾靴里拉雖然棄選查維亞靴南迪斯及杜斯山度士兩大球星，但殺雞焉用牛刀，放心捧1.62倍「讓主」。

（開賽時間：周四凌晨4:30）
新西蘭隊長受傷退隊

墨西哥教頭米基爾靴里拉棄選「小豌豆」實並非壞事，一嚟近期喺國家隊演出啞火幫唔到手，再者可以畀班球員知道「有能者居之」，狀態唔掂連天皇都冇面畀。米基爾靴里拉賽前喺記者會仲話未揀定箭頭人選，到時睇邊個弗就出邊個，試問奧利比柏拉達、魯爾占美尼斯、迪尼基斯幾名箭頭有得落場嘅話，點敢偷懶唔搏盡！

更何況墨西哥棄選外流球員，陣容以國內球會CF阿美利加及里安球員為骨幹，默契十足。賽前甚至有墨西哥體育網站舉辦競猜遊戲，球迷估中呢場附加賽兩回合總比數嘅話，將獲贈墨西哥世盃決賽周專用波衫，擺到明「預祝」國家隊出線咁話。

其實又好難怪墨西哥咁淡定嘅，新西蘭喺上屆世盃附雖然砌低巴林躋身決賽周，不過巴林同墨西哥級數差幾班唔在講，前線核心史美斯雖趕及傷愈入選，可惜年事已高活力大減，論經驗更唔及墨西哥中堅馬基斯，怕且好難搵到食。更重要係，隊長雲斯頓列特日前喺韋斯咸練波整傷足踝退隊，新西蘭冇咗呢支後防定海神針，成班後衞隨時震過貓王，輸兩球只係最低消費。