光輝添猛將打殘阿聯

猪拉多纳

今日澳職珀斯光輝主場對阿德萊德聯好有睇頭，前法國國腳加拿斯終於搞掂加盟手續，今仗可望首次披甲，令呢支「主場王」如虎添翼。反觀，阿德萊德聯三連敗，愈踢愈沉，相信珀斯光輝可以全取三分，為加拿斯開迎新派對，捧1.72倍主勝。

（有線64台周六下午2時30分直播）
車仔名將加拿斯來投

加拿斯曾經効力車路士、阿仙奴及熱刺等勁旅，卡士十足，即使呢位中堅已經36歲，但以佢嘅技術及經驗，應付澳職仍然綽綽有餘，起碼壓得住場，令隊友更加放心出擊，有助改善略為遜色嘅進攻火力。珀斯光輝另一強項係主場發揮出色，今季兩場主場都贏波兼不失，值得再追。

阿德萊德聯喺甘巴爾執教下虎頭蛇尾，近期表現直插谷底，連輸三場。後防主將保加特更因為上仗被逐，今場要坐波監，拍檔米高蘇路代表澳洲國家隊比賽而缺陣，令原本已經唔穩陣嘅防線更加危危乎，難阻光輝奏凱歌。