追風駿足戴眼罩搏

猪拉多纳

　　筆者唔記得幾耐之前講過，一匹質新馬贏完直路賽1000米，接戰轉跑田草1200米要再贏，除非有「鳥語花香」的級數，又或者有「紅衣巨龍」的潛質，否則真係機會渺茫。

　　第三場「點解」上仗一出即勝直路賽，如今部署此仗跑田草1200米，真係唔明「點解」會有這樣安排？此駒究竟能否克服？始終未有實戰證明，冇人有答案，總之我認為，馬房當然想贏，但想和事實是兩回事。再者，若果「點解」今次能克服這重大挑戰，反映牠應有90分左右的實力，而牠今仗面對難關，賠率又不好分，何不留待下仗才買？

　　相反，要博佢輸，就要揀今場。當然，我也想香港多匹星級馬，但站在投X者的角度，睇法自然完全不同。同場「好加加」、「駿多樂」及「一定旺」同是跑完直路賽，姑勿論跑得好與不好，我唔吼獨贏。值得博獨贏的馬只有兩匹，就是「獎金王」及「追風駿足」，「獎金王」勝在有經驗及已熱身，不過「追風駿足」今仗季內初出便戴眼罩，此駒曾於11月時戴眼罩試閘跑第二，而蔡約翰與莫雷拉近期又常合作搏殺，比較下必向「追風駿足」打主意。

    (馬會賽事 首席評述員)