修咸頓新星上位打爆廠

猪拉多纳

今季英超最令人驚喜球隊一定係修咸頓，「聖人」唔驚唔覺已殺上聯賽榜第三位，修咸頓呢類中小型班往往靠一股大無畏精神搏殺，一人走多一步，將勤補拙，今仗唔驚有歐聯後顧嘅阿仙奴，受讓抵玩，捧讓球客勝。

修咸頓財力肯定比唔上英超豪門，但勝在青訓系統出色，培訓唔少優秀新血，例如人氣急升嘅勞基梳爾、禾特普斯，加上精於四出搜羅價廉物美球員，整體人腳質素甚佳，其中列基林拔、積洛迪古斯、拉爾拉拿早前就一齊入選英格蘭，夠晒威水。修咸頓雖則冇星味，但勝在有球味，踢法實際有效率，作客利物浦及曼聯，分別取得一勝一和，已成豪門剋星，有權喺阿仙奴身上取得分數。
阿仙奴留力歐聯砌馬賽

阿仙奴今仗有禾確特傷愈復出倒戈母會修咸頓，佢早前喺自傳大爆前「槍王」尹佩斯成日搵佢做出氣袋，一輸波就賴禾確特唔傳波畀佢，有幾次兩人仲爭啲大打出手，好彩畀其他隊友阻止。禾確特今仗雖可復出，但狀態成疑，而且兵工廠嚟緊周中要應付歐聯對馬賽，球隊喺「死亡F組」同拿玻里及多蒙特鬥得難分難解，稍有不慎隨時出局，恐怕今場聯賽唔敢去盡，今仗兵工廠讓波有暗湧。　
now 621直播