富明尼斯護級搏殺吼客勝

猪拉多纳

山度士風流波要錢唔要主場

山度士要錢唔要分！巴甲去到最後3輪鬥志重於一切，基本上已經打緊風流波嘅山度士，話就話啱啱宣布下季換帥，搞到班球員無心戀戰，為咗錢，仲要將今晚主場對富明尼斯場波搬到去聖保羅州普魯登特總統城嘅普魯登圖球場舉行。反觀客隊富明尼斯家陣正為護級而戰，新帥杜利華祖利亞將班波操到火紅火綠兩連勝勁爆，今場平手盤梗係捧1.83倍「客勝」啦！

（開賽時間：周一凌晨3:00）

目前以35戰得48分排第10嘅山度士，高過護級安全線7分，基本上都已經安全。球隊冇乜好爭，管理層又對今季成績唔多滿意，日前就提早宣布主帥哥迪奧奧利華拉下季會離隊，球員今日唔知聽日事，試問仲點專心踢埋今季啲波吖！
富軍換帥後兩連勝

更加大鑊嘅係，由於山度士唔多滿意主場入座率低，想搬去帕卡恩布嗰邊比賽又因為保安問題遭拒，好彩呢個時候普魯登特總統城呢邊就開出條件，包晒場租同交通費搵佢哋嚟比賽，志在帶旺當地市況，山度士呢邊封晒蝕本門，仲會有較多門票收益，當然係飯應啦！但由此睇得出佢哋今場鬥心其實麻麻。

富明尼斯呢邊，目前得42分排15位，只係高過安全線1分，最後3場根本唔搏唔得。新帥杜利華祖利亞上任以來領軍兩戰兩勝，球員狀態同信心都返晒嚟，而且今仗佢哋有中場華拿、艾雲華倫西亞、左閘路蘭基羅斯齊齊傷愈，可以強陣出擊，就算話中堅甘姆停賽，都一樣值得捧場呀！