悉尼噴射機入波騷

猪拉多纳

星級外援正面交鋒

大家都知妹頭我百足咁多爪，日常除咗同大家一齊睇波同喺電台做DJ外，呢排都幫娛樂台拍玄學同旅遊節目。不過講到最鍾意嘅，都係做現場活動嘅司儀，因為一旦遇有突發事件就要執生，好有挑戰性！若果之後仲畀人讚反應快咯，就滿足晒喇！其實做澳職直播時都有好多突發嘢，例如衞星訊號突然斷咗冇畫面、拍檔突然畀問題考你，真係少啲專注力都唔得。

今日場澳職直播FC悉尼主場對紐卡素噴射機，賣點當然係迪比亞路同希斯基呢兩位澳職最有叫座力嘅外援對戰喇。論上屆演出悉尼同噴射機都只係排中游，但今屆兩隊士氣同狀態都「弗」。相比之下，噴射機以青春班迎戰就更令人驚喜，佢哋今季聯賽只係輸過一場，嗰場敗仗咪正正就係輸畀悉尼囉！你話冤家唔冤家？
阿當泰加特搶鏡

好彩噴射機之後表現愈戰愈勇，尤其是阿當泰加特搶晒鏡，呢位澳洲前鋒最近重入選埋大國腳！「大哥」希斯基又踢得番，話唔定佢同阿當泰加特「老嫩配」可以擦出新火花。

主隊悉尼最近亦重上正軌，雖然贏得險但就勝在多入波！踢過英超嘅李察加西亞加盟後喺進攻方面幫到手，減輕咗迪比亞路嘅壓力。講真呢排兩隊都好弗，要揀邊隊攞三分就難啲，但大家都係攻優於守，不如揀入球大仲穩陣！

（有線64台周六下午4時45分直播）
妹頭推介

FC悉尼 Vs 紐卡素噴射機

入球大