熱刺焗攻紅魔保佢大

猪拉多纳

聞見魷魚香 保亞斯唔想落鑊

今季豪花超過1億鎊擴軍，上周對曼城竟然大敗0比6，熱刺全隊上下可謂顏面掃地，而領隊保亞斯亦已聞到魷魚香，所以今晚主場大戰曼聯，球員為爭口氣、主帥為保帥位，定會傾力搶攻；不過紅魔剛啱喺歐聯5比0大炒利華古遜兼出埋線，士氣信心返晒嚟，作客唔怕同熱刺鬥攻，大盤可取﹗

（now 621周日晚8時直播）
力圖紓緩下課壓力

熱刺今夏用咗成億鎊「強化」陣容，但換嚟嘅卻係12場只入9球嘅恥辱數據，而更加恥辱嘅係呢隊英超防守王喺上場竟然食咗曼城半打光蛋，球員谷埋谷埋成肚火，今晚直情當同係曼徹斯特市球隊嘅曼聯係曼城，誓要用贏波嚟挽回面子，並紓緩一下炒魷壓力。

至於熱刺主帥保亞斯依家更係「命懸一線」，上場輸畀曼城已經有唔少球迷要求佢下課，雖然喺周中歐霸盃作客特林素贏番一場，但呢場屬無關痛癢嘅賽事，即使贏波亦未能夠平息民憤，因此今場對曼聯變成佢嘅「續命戰」，再輸佢就好大機會落鑊，所以今場對保帥嚟講係非勝不可。上場一名特林素球迷喺看台上向佢叫咗兩聲「炒佢」，即刻令對「炒魷」好敏感嘅保帥躁晒，並叫保安趕呢位球迷出場，就知佢真係壓力爆煲，所以今仗主場玩喪攻係無可厚非。
尹佬復出朗尼弗爆

曼聯上場歐聯大勝利華古遜5比0，「魔王」朗尼狀態弗到漏，5個入球有4球都關佢事，今仗更有射手尹佩斯傷愈復出同佢合作攻堅，攻擊力超晒班，而且上場對住升班馬卡迪夫城失分，目前喺聯賽落後榜首阿仙奴7分，爭標形勢不妙，再冇失分空間，球員爭勝心不下於熱刺，今場鬥攻格，捧大盤！