巴塞唔齊心吔包易骾親

猪拉多纳

今晚西甲壓軸好戲，榜首巴塞隆拿作客「地頭蟲」畢爾包。上周中巴塞喺歐聯意外輸畀阿積士，引發內部將帥不和，仲愈燒愈烈，踢波最忌唔齊心，況且佢哋近年造訪「巴斯克雄獅」冇乜甜頭，今仗絕對唔係贏梗，不妨冷敲讓球主勝。

（now 632周一凌晨4時直播）

今季巴塞改由馬天奴執教後，一直順風順水，但上周中歐聯喺打多一人嘅情況下，竟以1比2輸畀阿積士，令馬帥首嘗敗績，賽後佢鬧爆球員比賽冇heart，點知更衣室幾位大佬即刻反擊，好似隊長佩奧爾、碧基及沙維受訪嗰陣，不約而同批評馬帥嘅訓練強度不足，令球員唔夠體能同對手硬碰，因此對阿積士末段想追番亦有心無力，仲話馬帥亂咁輪換冇標準。
造訪畢爾包冇甜頭

由於美斯因傷今年提早收咧，仲返咗阿根廷養傷，馬天奴冇咗靠山未必鎮得住班大佬。畢爾包不嬲係地頭蟲，就算今季搬咗去新場一樣掂，唔計對奧沙辛拿借咗死敵皇蘇主場出戰，其後六場均不敗，最重要係「巴斯克雄獅」近五次喺自己地頭對巴塞和咗四場，擺明有計，況且「地上最強」有美斯、丹尼爾及域陀華迪斯等一大籮傷兵，斯維覺得畢爾包受讓相當筍，讓球主勝有2.3倍咪嫌少。