班士利錫周三教頭落鑊一齊反

猪拉多纳

英冠兩隊包尾大幡班士利同錫周三今周齊齊炒領隊，班士利喺上仗主場大敗畀伯明翰0比3後怒炒領隊大衛費列哥夫，而錫周三喺輸畀黑池後亦將主帥戴夫鍾斯落鑊，呢兩支「難兄難弟」周中快車將分別對白禮頓同李斯特城，捧對家勝為妙！

（周三凌晨3時45分開賽）

班士利將會作客「海鷗」白禮頓，「海鷗」近況不俗，近四場贏咗三場，其中兩場勝仗係對住實力相近嘅布力般流浪同韋根，今仗對住作客戰績差到暈嘅班士利更有把握贏波，班士利今季踢咗八場作客，輸足七場，今仗冇主帥領軍更難反彈，捧主隊勝！
葉士域治「細」水長流

至於另一弱旅錫周三將喺主場迎戰榜首李斯特城，錫周三今季喺戴夫鍾斯帶領下一蹶不振，踢咗十六場只贏得一場，嗰場大勝雷丁5比2只屬曇花一現，之後球隊連輸三場，反觀李斯特城狀態托弗，作客都唔使驚，客勝捧得過。

最後推介另一場英冠，葉士域治主場對布力般流浪，兩隊近期都常開細盤，今場一於再捧細！