摩納哥新星射爆尼斯

猪拉多纳

冇「老虎」一樣掂

前排經歷3場不勝低潮嘅摩納哥，球員同教練雲尼亞里始終質素高，經過啱啱國際賽期調整，話咁快就重返正軌，法甲兩連勝，今晚喺聯賽作客成績跌到落谷底嘅尼斯，就算冇「老虎」法卡奧都照捧1.73倍客勝！

（TVB301周三凌晨4:00直播）
尼斯三線傷兵滿營

盛傳喺法甲踢得唔開心嘅法卡奧，最近畀車路士主帥莫連奴吼到實，打算喺冬季轉會窗豪擲6,600萬鎊再搭埋費托交換。不過摩納哥班主魯博洛夫列夫隨即澄清：「佢喺呢度過得好開心，對摩納哥嘅感覺好好，我喺冇耐前至同佢兩公婆食飯，冬季轉會窗重開後佢肯定唔會走！」

走唔走都好，法卡奧今場大腿傷勢未明，教頭雲尼亞里都話要再睇情況先知出唔出得。不過「老虎」喺上輪缺陣，就畀咗機會法國新星安東尼馬迪爾上位，呢名17歲箭頭上場首度正選即刻入波交足貨，今晚再夥拍占士洛迪古斯、利維亞尼等猛將搏殺，面對三線傷兵滿營、連正副選門將都打晒柴嘅尼斯，摩納哥要「幫」對手締造聯賽6連敗有幾難！