富明尼斯護級搶分「大」無畏

猪拉多纳

巴甲今晚煞科，焦點唔使問阿貴都知係富明尼斯，究竟佢哋會唔會成為巴甲史上首支奪冠後第2季隨即降班嘅球隊呢？老實講，富明尼斯鬥心就肯定夠，奈何人腳天殘地缺，造訪冇晒包袱嘅巴希亞，似乎玩個2.1倍大最好路喎！

（開賽時間：周一凌晨3:00）
防線穿窿入得又失得

上季巴甲盟主富明尼斯今季大跌Watt，家陣揸住44分排尾3，今晚除咗要望幾支護級球隊好似華斯高、哥列迪巴同基斯奧馬失分之餘，自己亦要做好本分砌低巴希亞先有機會逃出生天。會方好緊張今場生死戰，上禮拜五已經飛抵巴希亞，去酒店放低行李之後就即刻展開閉門操練，勁有鬥心。

不過想贏同贏唔贏到係兩件事，要知道左右二閘般奴韋拉、李安度都打咗柴，中堅迪加奧要停賽，最做得嘢嘅箭頭費特亦養緊傷，後防穿晒大窿都焗住要攻，隨時前面入埋唔夠後面輸喎！
巴希亞上岸踢風流波

反觀主隊巴希亞已經上咗岸，今仗照計係例行公事，之但係話晒呢場波係煞科戰，班Fans已經當正今晚係嘉年華咁，準備喺賽後開Party，3.4萬張主場波飛前日已經售罄，球迷咁捧場，巴希亞冇理由唔做齣好戲o架？冇晒心理包袱肯定踢得開放，對住富明尼斯肯定「大」得起！