曼城大鬧狐狸竇

猪拉多纳

「餓波」二線兵喪攻唔留手

英超富豪球會曼城狂數阿仙奴威震英倫球壇，霸氣盡現，今次於聯賽盃八強作客英冠「狐狸」李斯特城，實會食住個勢繼續喪攻。曼城後備陣容星光熠熠，好似迪斯高呢類星級戰將餓波多時，唔會放過對手，呢場係大勝格，捧大！

(TVB302周三凌晨3時45分直播)

曼城上場喺英超巔峰對決技術性擊倒阿仙奴，阿古路、尼格度同大衞施華等星級進攻球員發揮冇得頂，其中射手阿古路陣上勇戰傷出，今場唔使預佢。由於近期賽程都幾密，預期教頭比歷連尼會作出輪換，上仗搏完嗰班哥仔相信都可以抖抖，會由第二梯隊頂上爭奪呢個盃仔。

曼城擁有英超最強陣容，拆開兩隊踢一樣咁掂，隊內二線兵查實都係一線球星，射手迪斯高有力於任何一間大會打正選，家陣只被投閒置散，可見呢隊波真係好得人驚。快翼捷西斯拿華斯、中場占士米拿及查維加西亞等都係有料之人，呢個陣打英超都掂，去到英冠「狐狸竇」夠殺啦！
李斯特城有heart搏命還擊

李斯特城現於英冠位列第三，上圈主場4比3險勝英超下游分子富咸晉級，踢落好有鬥心。射手紐根特以往喺英超踢樸茨茅夫打唔起，呢次重返大舞台都想踢場爭氣波。李斯特城守將迪拿特、中場真獲特同馬菲占士之前都係曼聯人，面對仇敵曼城實搏。兩軍搏命爭出線，捧大啦！