阿蘇半場收你工

猪拉多纳

卡城內亂 紅軍喪攻

利物浦主場鬥卡迪夫城，兩隊近況可謂天同地比，主隊氣勢如虹，連續3場狂數對手4至5粒，而「紅龍」則正值風雨飄搖之際，班主陳志遠同領隊馬基麥基嘅裂痕已到無法修補嘅地步，馬基麥基隨時冇得撈，球員軍心嚴重不穩，今晚紅軍仲唔趁佢病攞佢命，再大炒一場。但鑑於大盤過熱得1.43倍，今仗一於博吓2.02倍嘅半場大。

（now 621周六晚8時45分直播）
中場冇謝拉特仲勁

利物浦今季火力驚人，喺主場晏菲路出戰殺傷力就更猛，錄得5連勝之餘，更入咗20球咁多，堪稱地獄主場。毫無疑問，紅軍近排狂入波皆因有個神級前鋒蘇亞雷斯着晒火，近3場總共射入8球，狀態簡直係恐怖﹗呢位英超神射手至今入咗17球，當中有12球係喺主場獲得，今仗又係阿蘇大開殺戒嘅好時機。

紅軍今場繼續有隊長謝拉特缺陣，相信好多利迷仍會認為冇咗呢位神奇隊長，利物浦就唔掂，但上場大炒熱刺5比0，已證明咗紅軍已經改朝換代，冇咗謝拉特嘅中場線改由一眾年輕有活力嘅中場如佐敦軒達臣、菲臘比古天奴、史達寧同祖阿倫孭飛，中場運轉反而更流暢，呢班後生仔踢地波為主，令到成隊波踢得更快、更爽，攻勢水銀瀉地。依家利物浦現時只落後榜首阿仙奴2分，今場贏波就有得過吓1哥癮，梗係採取主攻啦!而且呢隊波好鐘意喺上半場就搶疆，毫不留力，近6場有5次開半場大就知佢哋攻得有幾癲﹗
「紅龍」作客例唔掂

卡迪夫城今季畀人不少驚喜，主場贏過曼城、迫和曼聯同愛華頓，但一作客即由龍變蟲，8場作客僅1勝，再加上球會內部局勢混亂，老細陳志遠一向同領隊馬基麥基不和，更有傳馬基麥基炒魷在即，甚至連賽前記者都改由助教卻斯歷克代馬帥出席，球隊依家士氣非常低落，睇嚟今次遇上紅軍都係等做沙包捱打，半場已經「被收工」﹗