抖足９日主場復仇 流浪者手刃仇人

猪拉多纳

澳職中岸水手好頻撲，剛於上周四鬥完威靈頓鳳凰，今日又要作客西悉尼流浪者。水手今季成績大倒退，球員狀態持續冇起色，恐怕無力應付一周雙賽。西悉尼流浪者有9日時間休息，全隊養精蓄銳，正好趁機報上季總決賽一敗之仇，直取主勝。

（有線64及203台周一下午4時直播）
水手頻撲缺態

中岸水手今季攻守表現都跌晒Watt，上仗對住仲未開齋嘅威靈頓鳳凰，竟然處於劣勢，門前風聲鶴唳，全靠門將列迪屢救險球，包括撲出12碼，先至保得住1比0勝果，表現相當狼狽。水手面對魚腩球隊，都踢得咁辛苦，可見球員根本唔在狀態，今仗鬥爭標強隊流浪者，呢支堂堂上季總冠軍今場客Ｗ竟然冷到4.55倍，就知冇料到。

西悉尼流浪者上仗力挫紐卡素噴射機，整體演出有番霸氣。球隊近日同門將高域及後衞沙朗高爾續約，亦有助穩定軍心。兩位前鋒杜米祖歷及辛達利比已經傷愈，今仗可望復出搏殺，亦大大提升贏波本錢。流浪者另一個優勢係抖咗9日，反觀水手得4日休息仲要作客，體力必然比主隊輸蝕，捧流浪者主勝絕對有理。