砂岩+1偷雞

猪拉多纳

水手聯賽失冠未回魂

日本天皇盃四強戰展開，日職亞軍橫濱水手主場對鳥棲砂岩，水手失去聯賽冠軍後未收拾心情，隨住王牌射手馬昆奴斯離隊，大軍鋒力急降，上場對住日職包尾大幡大分三神贏得異常辛苦，今戰讓唔起砂岩，要讓球客勝。

（有線148台及now 711周日中午12時05分直播）

橫濱水手今季喺大好形勢下失落聯賽冠軍，班兵全部謝晒，射手馬昆奴斯搵定後路，已落實來季轉投神戶勝利船，另一箭頭齋藤學就想出國搵食，軍心不穩問題都幾嚴重。水手將士帶住沉重心情應付天皇盃，上場對三神踢來力不從心，搏到加時先由守將富澤清太郎奠勝，發揮都幾曳，後備箭頭藤田祥史冇乜卡士，難以撐起鋒線。

反觀鳥棲砂岩愈戰愈勇，十月尾至今聯賽連盃賽保持七場不敗，先後砌低鹿島鹿角及浦和紅鑽等實力分子，唔赦水手！
三箭訪東京特醒

另一場四強戰ＦＣ東京會於東京國立競技場對廣島三箭，東京佔半個主場之利，但今仗箭頭盧卡斯施維連奴要養傷，另一射手平山相太要坐波監，攻力大減。三箭精神領袖佐藤壽人上場打破入球荒，大軍矢志爭做雙料冠軍，結合近六次到訪東京贏五場靚績，平手盤抵玩啦！

（有線148台及now 711周日下午2時直播）