龐貝尊主重振雄風

不死鸟

數據表面睇只係一堆數字，但係有陣時真係唔到你唔相信佢?威力。早幾日響本欄提過，澳洲嘅一級賽女皇伊利沙伯錦標一向唔利三歲馬，果然宿命難違，呢批新生代今年雖然有五匹精英強攻呢項二千米大賽，但最終都係失望而回，全部都唔係前明星馬「龐貝尊主」嘅手腳。

       因為傷患關係令成績停滯不前嘅「龐貝尊主」，今場響廖偉德胯下首先衝線，而響半個馬位後過終點嘅Metal Bender就同Sarrera鬥得難分難解，結果影相亦分唔到勝負最終並列亞軍。

        自○七年三月勝出澳洲盃之後，「龐貝尊主」足足食咗兩年白果，呢場頭馬對於馬匹本身當然係好重要，對鞍上人廖偉德亦別具意義，因為「龐貝尊主」係佢月前因車禍意外去世嘅爸爸生前最喜愛?馬匹之一，所以響衝線一刻，腦海第一時間就諗起爸爸嘅說話，眼淚忍唔住湧出嚟。

        訓練呢匹馬嘅佩思，賽後亦話自己都忍唔住喊咗出嚟，咁失威除咗受廖偉德嘅一番說話感動之外，另一個原因係呢場頭馬證明咗佢哋對匹馬嘅耐性冇白費到。「龐貝尊主」依家重返凱旋門不特止，仲幫佢贏得從練以來第一場悉尼舉行嘅一級賽，所以情緒咁激動。

       既然重振雄風，佩思打算乘勝追擊，安排「龐貝尊主」展開遠征之旅，出爭三個星期後響新加坡克蘭芝馬場上演嘅二千米一級賽新航國際盃，出發之前，會以Hollingdale Cup作為熱身賽。