好先生操足可捧盃

不死鸟

早前連續跑咗兩日谷草，目的係希望沙田馬場經過一段時間養草後，場地偏差冇咁嚴重，加上剛戰採用最闊嘅Ａ欄，當然係想女皇盃可以響最好嘅場地上角逐，對每一匹參戰馬嚟講都會公平啲。

         不過天公不造美，經過一場大雨之後，剛戰又再出現場地偏差，跑咗幾場就知場地大利內檔同擺前走嘅馬，後上馬想追都難。雖然賽果未至於連場爆冷，但係兩場大賽嘅大熱門都未能夠勝出，其中冠軍一哩賽「好爸爸」同「閒話一句」跟響中間位置競逐，但係點都唔夠前置嘅「勝眼光」同「再領風騷」好跑，結果大、次熱門雙雙落敗，反而「勝眼光」就爆出匹六十幾倍大冷獨贏，條Ｑ更派成二千幾蚊。至於女皇盃嗰場，賽果雖然正路啲，但「爆冷」同「自由好」都係鬥唔過外隊馬「百威勝」，未能為港爭光。

        緊賽事響五一勞動節舉行，馬會專登安排響假期跑馬，無非係想畀市民有得娛樂一啲，但係最近墨西哥爆發豬流感，而且疫情正擴散至其他國家，雖然香港暫時末有染病個案，但唔多唔少都影響到市民嘅心情，希望唔會令投注意慾都冇埋喇﹗

       周五沙田十一場賽事之中，有兩場係盃賽場合，先講二千四百米嗰場皇太后紀念盃，小妹決定追多一次何廐「好先生」，上次已經睇好呢匹馬，但結果只響千八米跑第四而回。賽後操練更積極，今次吼準盃賽報名必定有心出擊，未開齋馬鬥志十足，可作為今場馬膽。