三箭水手強細爭霸

猪拉多纳

聯賽冠亞軍搶天皇盃

日本天皇盃王者戰由今季日職冠、亞軍球隊對決，一哥廣島三箭將於東京國立競技場同二哥橫濱水手爭霸，水手相隔22年再打入天皇盃決賽，三箭就爭做雙料冠軍，兩軍踢法同樣穩打穩紮，決賽場合唔會亂搏槌，今場吼入球細。

（有線148台及now 711周三下午1時直播）

踏入日職時代，橫濱水手只曾喺1992年稱霸天皇盃，嗰次亦係佢哋過去22年嚟唯一一次殺入決賽，一擊即中都幾叻仔。水手今季最後兩周聯賽腳軟輸晒冇咗個冠軍，今次撞返仇家廣島三箭，中村俊輔同杜特拉等高齡球員一定會搏埋條老命報仇。不過，大軍失去王牌前鋒馬昆奴斯後鋒力大減，冇條件強攻對手，今戰將會穩中求勝，要靠「死球帝」中村俊輔發功爭取士哥。
兩軍穩陣近績旺細

廣島三箭連續兩季成功稱霸日職，勝在夠韌，班波去到關鍵時刻總能用埋最後一啖氣拚搏，對上兩圈都係互射12碼淘汰對手，國腳級門神西川周作家陣信心爆晒棚，唔係咁易失守。蘇豪今夏到訪過三箭大本營，睇見教頭森保一同班球員關係非常好，呢個三箭名將深得民心，所以班兵先咁鬼搏命，球隊出名防守有紀律，一場過生死戰唔會立亂谷前搞到後防空虛。

水手同三箭今季於聯賽鬥到最後一輪先分出高下，水手遺憾失冠，當然想捧返隻盃做安慰獎啦，但三箭亦好恨做雙料冠軍，兩班波都係打得好穩陣，水手近六戰全細，三箭近九戰八場開細，今場王者戰會守得更肉緊，細盤啱數！
近五屆天皇盃決賽成績

日期 賽果

1/1/2013 柏雷素爾 1:0 大阪飛腳

1/1/2012 ＦＣ東京 4:2 京都不死鳥

1/1/2011 鹿島鹿角 2:1 清水心跳

1/1/2010 大阪飛腳 4:1 名古屋鯨魚

1/1/2009 大阪飛腳 0:0 柏雷素爾（加時大勝1:0）