新特蘭反彈拉唔住

猪拉多纳

普耶領黑貓走出谷底

新一年新開始，肥叔喺度祝大家身體健康、財運亨通。英倫三島聯賽開快車，今個元旦日賽事好熱鬧。英超前列三強阿仙奴、曼城及車路士過去兩輪快車全勝，利物浦一下子跌落第5，令爭標形勢更緊湊，實在引人入勝，英超被譽為世界第一聯賽，的確實至名歸。各位睇名牌勁旅精彩表演嘅同時，亦要留意榜尾新特蘭靜靜起革命，「黑貓」經過普耶調整後，表現愈嚟愈對辦，下半季可望大翻身，今晚主場小讓沉到爆嘅阿士東維拉平半，力捧上盤。

（now 635周三晚11時直播）
維拉頹爆冇晒信心

普耶執教白禮頓期間，已經證明自己係有料之人，將弱隊變成爭升班勁旅。呢位「球隊醫生」10月中接手新特蘭帥印後，令病入膏肓嘅「黑貓」漸有起色，近5仗更保持不敗，包括英聯盃加時淘汰勁旅車路士，早前兩輪快車搶到4分，當中作客力挫愛華頓，夠晒說服力，顯示普耶改革收到成效。目前普遍莊家亦開始調高新特蘭評級，即使現時排包尾，但今仗都要讓波，可見對「黑貓」充滿信心。

相比之下，維拉就愈來愈沉，對住另外兩支護級分子富咸、水晶宮，都輸波收場，近5場聯賽只拎到1分，球員表現冇晒信心，經過連番打擊後，作客對來勢洶洶嘅新特蘭，肯定被食住，受讓都冇着數。
水晶宮發窮惡打「雀」

另一場英超水晶宮主場迎擊「金絲雀」諾域治，水晶宮上仗鬥曼城踢得有板有眼，僅負1球有晒交代，佢哋都係屬於發窮惡球隊，現時急需搶分護級，主場讓得起「金絲雀」平半，要上盤。

（now 633及660周三晚11時直播）