巴塞炒艾爾切祭名宿

猪拉多纳

西甲榜首巴塞隆拿歇冬後今晚首度登場，將坐鎮主場迎戰升班球隊艾爾切。「地上最強」雖有王牌射手美斯繼續休息，但好拍檔尼馬及門神域陀華迪斯及時復出，加上球隊名宿塞格爾啱啱離世，呢類「帛金波」場合唔會Hea踢，整定艾爾切冇運行，就算讓球主勝要讓兩球都冇有怕。

（now 632周日晚11時直播）
尼馬停賽完畢復出

傷愈冇耐嘅美斯，近日練波喺負角度下「倒西」入波嘅片段於網上瘋傳，證明狀態唔錯，佢日前返回巴塞隆拿即刻跟大隊操練，但今場暫時收起。防守中場布斯基斯今仗要坐波監，但弗到爆嘅「新比利」尼馬停賽一場後，連同剛剛好番嘅首席門神域陀華迪斯喺今仗復出，人腳齊整番唔少。

由於巴塞嘅90歲名宿塞格爾日前逝世，為咗悼念呢位曾為球隊五奪聯賽冠軍嘅功勳前鋒，今仗賽前會進行默哀儀式，巴塞眾將亦會戴住黑紗比賽，呢類「帛金波」總能激起球員嘅戰意，絕對唔會因艾爾切嘅實力差幾條街而放軟手腳。

今季先升班嘅艾爾切一輪虛火過後，近五仗輸足四場，迅速打回原形，今仗不但有鐵衞達米安蘇亞雷斯停賽，連門將文奴耶古亦因傷缺陣，防線隨時大出洋相。睇番依家一哥巴塞與馬體會同分，為迎接下輪作客馬體會嘅榜首大戰，巴塞今次實搵艾爾切祭旗以壯行色，淨勝三粒乃基本消費。