些路迪讓客「聖」算高

猪拉多纳

蘇超同英超一樣，都有聖誕新年快車，當中蘇超更加要喺兩星期內踢5場聯賽，體能要求甚大。但對於人腳充足嘅些路迪嚟講，相對影響當然較細，呢支仍然喺聯賽保持不敗身嘅勁旅，今晚作客防線跌Watt嘅聖美倫，1.64倍「讓客」夠晒穩陣。

（亞視國際台周日晚上8:45直播）
聖美倫連續5場失守

聖美倫喺上周四聯賽雖然由前鋒阿當甘寶先開紀錄，可惜後防接連犯錯，最終以1:2輸畀基爾馬諾克。計落佢哋已經連續兩場比賽喺領先嘅情況下失分，咪話唔打擊士氣。而且經過連場征戰後更見疲態，加上隊長葛雲、中場泰亞利、守將大衞巴朗仲未踢得，以佢哋連續5場失守嘅防線，幾難擋得住些路迪攻勢。

對手些路迪取得聯賽8連勝，當中6場更保持清白身，以聖美倫嘅鋒力相信幾難偷到雞。而且些路迪有中場保爾列達同後衞梅古回歸，陣容更見完整。盛傳領隊連儂打算喺今個月買入狼隊射手利治格菲斯，一眾前鋒見到自己地位受到威脅，今晚落場仲唔搏命數胡咩？