皇馬新星射爆切爾達

猪拉多纳

安察洛堤畀機會上位

今晚西甲重開續有好戲，皇馬歇完冬後首度出擊主場迎戰切爾達。「銀河艦隊」青訓新星謝斯洛迪古斯火速上位，正所謂初生之犢不畏虎，加上粉絲力撐佢代替「懶貓」賓施馬，若果呢位小將披甲必盡騷哥利搞冧切爾達，就算讓球主客和皇馬要讓到兩球，都照撐讓球主勝。

（now 632周二凌晨2時直播）

皇馬教頭安察洛堤先後攞過意甲、英超及法甲冠軍，撈得咁掂，除咗識波之外，仲叻氹老闆及粉絲。前主帥莫連奴離任時罪狀多多，其中一項就係忽視青年軍，「肥安」上任即刻做嘢，佢今季喺正式比賽起用自家培訓嘅新星約1,700分鐘，卡斯米路、拿祖費南迪斯及艾華路莫拉達都獲得機會，比起10-11年球季莫帥同期多幾條街，其中前鋒謝斯洛迪古斯乘勢彈起，不但喺國家打吡對巴塞破蛋，歇冬前更後備上陣絕殺華倫西亞，早前同巴黎聖日耳門拍跳又有士哥弗到震。
切爾達作客例腳軟

據《阿斯報》民調顯示，有81%球迷希望謝斯取代懶到暈嘅賓施馬出戰切爾達，若果呢位生牯仔披甲一定搏甩髀。切爾達喺主帥安歷基帶領下，愈踢愈冇信心，尤其係作客經常腳軟，近3仗輸晒，對住喺巴拿貝球場出名鑊氣勁重嘅皇馬，都係大炒格，皇馬要贏3粒真係依絲執。