摩納哥虎咬蒙軍

猪拉多纳

法卡奧轉會唔成搏老命

今晚法甲歇冬後重開上演好戲碼，由「暴發戶」摩納哥作客對蒙彼利埃，備受轉會傳聞困擾嘅摩納哥射手法卡奧，上周復出即用入波以表忠誠，加上對手蒙彼利埃愈踢愈沉，仲唔畀餓波已久嘅「老虎」咬到屁股開花咩？客W乃不二之選。

（TVB 301周六凌晨3時30分直播）

自從高價轉投摩納哥後，有傳「老虎」法卡奧嫌棄球隊冇得踢歐聯，歇冬前更詐傷唔操練博走人，搞到犯眾憎。冬季轉會窗已經重開咗，但想斟佢過檔嘅「潛在買家」皇馬及車路士冇晒聲氣，法卡奧眼見勢色唔對即轉軚，喺訓練嗰陣搏晒老命，腳腳七注。上周法足盃摩納哥作客3比2險勝低組別球隊瓦納，整體表現令人失望，不過「老虎」開波冇耐即建功，非常搶韁，希望用實際行動氹番教頭雲尼亞里，以呢位哥倫比亞國腳嘅級數，只要正常發揮，喺法甲絕對可以打橫行。
蒙彼利埃愈踢愈沉

其實摩納哥一班90後如占士洛迪古斯、安東尼馬迪爾、利維亞尼及恩歷克卡拉斯高，近排都輪流發威，正係呢班新仔咁鬼積極，激發起法卡奧嘅鬥心。相反前季聯賽盟主蒙彼利埃今非昔比，雖然上周盃賽順利晉級，但對手只係丁組仔羅德茲，不足為據，睇番佢哋之前十場聯賽未嘗一勝，入得四球咁大把，連還手之力都冇，真係見到都唔開胃，加上近年主場出擊都畀摩納哥食住，今仗點頂「猛虎出柙」嘅法卡奧？摩軍嘅客W有1.72倍咪嫌少。