諾在其中:喜寶寶出王牌補中

不死鸟

今日韋達停賽前騎足十一場，但講到牌面馬就唔夠柏寶多喇﹗柏寶九匹坐騎中，第四場「威武雄星」、第九場「蓮華生輝」同第十場「千杯不醉」隔夜都被捧成熱門，唔使講騎師王賠率當然係熱辣辣，既然上個賽日柏寶連中三元，兼憑「勝眼光」爆冷捧盃，手風咁順，今戰繼續連場數胡亦一啲唔出奇。

威旺寶寶增程有計

        第六場四班二千米，「喜寶寶」最近兩仗非冠即位，上場增程跑千八米，結果輸半個馬位畀「善風」跑第二，證明本身有足夠氣量，試準後跑二千米，馬房更用王牌報名上陣，明顯已係有備而來，一於做膽。配腳方面，「威旺寶寶」轉投摩廐後初出即入位，似乎練者已搵到操養竅門。上仗出閘後，只見馬偉昌即留到包尾位置，入到直路先發力追趕，結果末段交出22秒77嘅快時間，今仗突然報爭大長途必定有計，回配主帥千祈咪睇小。

       「巴圖魯」上場千八米跑第三輸半個馬位，改配蘇狄雄續負輕磅，抽得二檔亦有利放頭，要拖。「歡樂滿堂」七歲馬狀態唔差，田草二千米以往贏過兩次，不容輕視。

        另一場心水係第十場三班千六米，四歲自購馬「千杯不醉」今季首度喺香港上陣，早前一直由姚廐訓練，可惜始終未能打開勝門，搞到幕後亦將愛駒交畀伍碧權接手。埋門勤加操練兼強配柏寶，隔晚亦有唔少飛數支持，有力一出即省靚招牌。

        配腳優先留意「鎗臣」，今季先後已贏咗三場，尤其千六米更加兩戰全勝，三歲質新馬肯定仲有大把進步空間，應與「千杯不醉」有一番惡鬥。「家家興旺」近兩仗非勝即位，同主馬出名鬥志十足，磅輕檔佳要兼顧。揀多一匹可博有分頭嘅「龍的傳說」。