皇馬玩謝「愛奴」

猪拉多纳

C朗「歸位」 巴利罰球準

「金球天王」領軍開騷！今晚西班牙盃8強首回合，將會有皇家馬德里作客愛斯賓奴，「銀河艦隊」喺新科金球獎得主C朗拿度，同埋「新罰球王」加里夫巴利聯手下，要大炒實力唔算強嘅主隊唔係難事，梗係力捧1.65倍「讓球客勝」啦！

（now632台周三凌晨4:00直播）

皇馬喺聯賽雖然暫時未能登上榜首位置，但其實「銀河艦隊」喺各項賽事已取得8連勝兼勁入19球，兼且連續6場1球未失，無論防線定係鋒線表現都非常出色！梗係啦，C朗拿度還咗拎金球獎個心願之後終於「歸位」，近兩場都取得入球交出上佳表現，最緊要係連帶班隊友都踢得好咗吖嘛！
愛斯賓奴防守唔掂

唔止受轉會傳聞困擾嘅迪馬利亞大踢「爭氣波」，同樣連續兩戰取得「士哥」；加埋被西班牙《馬卡報》譽為「新罰球專家」嘅加里夫巴利，呢位左腳仔除咗上仗對貝迪斯射入靚絕罰球之外，早前喺聯賽對西維爾同埋面對歐聯對手加拉塔沙雷時，亦都曾經靠呢招入波，今季罰球嘅準繩度達到非常驚人嘅66.6%，有咁強嘅進攻火力，試問又有邊個對手頂得住先？就算沙治奧拉莫斯可能缺陣都唔驚！

愛斯賓奴近排喺主場5場比賽獲得4勝1負，睇數據就好似幾勁嘅，但佢哋嗰場敗仗正正係輸畀皇馬，而且佢哋近6戰得1場冇失波，證明防守根本唔穩陣，就算有近況唔錯嘅沙治奧加西亞壓陣，都好難同皇馬抗衡喇。