紅魔落後焗攻啱胃口黑貓大鬧奧脫福

猪拉多纳

到底曼聯教頭莫耶斯個免炒金牌幾時失效？睇埋今場就知啦！曼聯於英格蘭聯賽盃四強次回合回師主場對新特蘭，「紅魔鬼」首回合落後1比2，今戰都係焗攻，但佢哋條豆腐防線無法予人任何信心，1.26倍Ｗ買唔落手，玩大盤好過！

（TVB301周四凌晨3時45分直播）

咩叫低處未算低？曼聯咪就係最佳例子囉，球隊踏入2014年五戰四敗，灰過魁北克，最正係莫耶斯夠膽死話球隊仲有機會爭標，聽到嚇一跳，然後得啖笑！標係有得爭嘅，不過係聯賽盃錦標囉，查實首回合輸緊一粒唔係世界末日，但佢哋今季先後於主場不敵西布朗、愛華頓、紐卡素同史雲斯呢類中型班，呢個1.26倍主W絕對唔穩陣囉！
曼聯豆腐防線難保清白

曼聯於兩大射手朗尼同尹佩斯養傷期間進攻乏力，莫耶斯若有心晉級，麻煩將香川真司擺去中間造波，否則又會見到兩翼亂斬畫面無限loop！「紅魔鬼」谷前搶攻後防必空，防線重心尼曼查維迪上場怒剷申請紅牌今場唔使踢，賴低基斯史摩寧、莊尼伊雲斯等人扼守中路震過貓王，左閘艾拉亦有傷，隨時要用攻守都唔掂嘅阿歷山大畢拿，咁嘅組合，前面入埋都唔夠輸啦！
新特蘭免費接fans打氣

新特蘭首回合憑波連尼射入爭議十二碼奠勝，呢個利物浦借將唔會錯過打落水狗嘅機會，左腳王阿當莊臣近兩仗獨建四功狀態超勇，大軍作客一樣有本錢士哥。早排傳出曼聯想斟「黑貓」門神文路尼，相信係莫耶斯擾敵之策，佢並冇中計，仲話唔怕「紅魔鬼」，而球會就特別安排免費巴士接送粉絲去奧脫福，咁好招呼，梗係嗌大聲啲打氣啦。

莫耶斯話就話有免炒金牌，但眾怒難犯，若然今戰有乜閃失恐怕「魔粉」反莫行動會進一步升級，到時太上皇費爵爺都未必保得住佢。兩隊今季兩次交手同樣開大，今場預期都係入球騷，要大盤。
領隊Chit Chat

莫耶斯(曼聯)：我哋將會用盡全力作戰，希望可以成功晉級，我都意識到球迷唔係好開心，好希望做啲嘢令佢哋更加高興。

普耶(新特蘭)：去到奧脫福一定要好似上場頭廿分鐘打得咁好，如果唔係就會出局！我哋要做啱晒所有嘢，處理好每個細節。