C朗股勵皇馬殺無赦

猪拉多纳

西甲早場皇馬主場迎戰CF格蘭納達，「銀河艦隊」王牌C朗剛被英國傳媒選為全球男子靚籮三哥，佢嘅「股」勵令無數異性神魂顛倒，今晚佢仲會喺巴拿貝球場高舉新鮮出爐嘅國際足協金球獎，向粉絲致意，喺呢啲咁有意義嘅時刻，葡萄牙萬人迷又點會失威呀，撐讓球主勝。

近日英國傳媒評選全球男子靚籮排名榜，C朗於滿分80分攞到72分躋身前三，連荷里活型男畢彼特都唔夠佢揮，僅次於超模David Gandy及《失戀自作業》男星畢利谷巴，C朗一向爆肌加麒麟臂已經引死女，估唔到依家做埋「股巨肌」，真係乜都畀佢玩晒。講番今晚對CF格蘭納達場波，賽前C朗會向巴拿貝球場8萬名球迷展示月初獲頒嘅金球獎，接受主場粉絲吶喊助威，呢啲咁有意義嘅時刻，C朗梗係想入多幾粒攞威，一洗周中西盃對愛斯賓奴倒掛踢空波嘅火羅樣。
CF格蘭納達怕咗巴拿貝

除咗C朗要威之外，踏入2014年，皇馬於6場正式賽事贏晒，仲要一球都未失過，唔單止天價飛翼加里夫巴利愈踢愈好，連「懶貓」賓施馬亦攻入個人喺「銀河艦隊」嘅第101球，攻守都咁掂弗到冇朋友，CF格蘭納達真係未踢已經腳仔軟，況且佢哋兩次作客巴拿貝球場都大敗而回，今仗都係凶多吉少，皇馬為追趕巴塞同馬體會實殺無赦，讓球主勝有買趁早。
now 632直播