拉素殘陣祖記乘機抽水

猪拉多纳

7件主力唔出得

拉素今季傷兵滿營，最近又收到壞消息，中場艾達臣右腳重傷，要抖成6個月，今季提早收咧。今輪聯賽拉素主場鬥祖雲達斯，雖然祖記喺周中意大利盃被羅馬踢出局，但係拉素個陣咁殘，相信「老婦人」今場可以即時反彈，博2.68倍「讓客」！

（TVB301周日凌晨3:45直播）
祖記唔賣保羅普巴

拉素上仗以3:2力挫烏甸尼斯，但嗰場波其實係「慘勝」，皆因佢哋件中場艾達臣右腿受創，經檢驗後證實要抖半年，最慘係「藍鷹」現時已經有前鋒艾美蘭奴艾法路、中場鴨都拉干高、守將洛華拉迪同史堤芬拉度4名傷兵，依家連艾達臣都做埋十字軍，中場奧根耶奧拿斯同魯歷又要停賽，拉素主帥利查可用嘅兵真係少得可憐。佢哋現時唯一嘅好消息，就係有輕傷嘅艾華路干沙利斯今場可以披甲，同史堤芬拉度已經復操，不過冇咗7件主將，得番2個有咩用？

另邊廂，祖記上仗都輸咗畀羅馬，喺意大利盃8強出局，雖然話士氣未必好似之前歇冬後3連勝咁勁，但佢哋勝在成隊齊齊整整，只係得守將基亞連尼坐波監。就算近日傳出巴黎聖日耳門想掟7,000萬歐元（約7.4億港元），硬撬中場猛將保羅普巴，不過祖記唔太等錢使，當然睬你都傻啦！