蘇B倒戈大鑊 紅魔馬到攻城

猪拉多纳

英超快車期最矚目戲碼首推曼聯主場對卡迪夫城，「卡城」主帥蘇斯克查倒戈出戰母會，本來諗住做硬男主角，點知仲有「紅魔鬼」有新兵桑馬達殺到，處子登場為晒3,700萬鎊身價肯定會瞓身攻「城」，亦令呢場深宵大戰充滿話題，今仗兩軍其他配角janl 會交足貨，雙方將合演一場精彩入球騷，捧大有着數！

（now 623周三凌晨3時45分直播）
桑馬達提升創造力

蘇斯克查重返奧脫福夢劇場，賽前受訪時話百感交集，一方面多謝「紅魔鬼」球迷多年支持，同時又要顧住新主卡迪夫城粉絲嘅感受，其中最過癮係講到屋企幾隻化骨龍嘅反應：「佢哋問我應該支持老竇定曼聯，我梗係叫班細路撐自己啦！」不過，公還公，私還私，佢話自己跟足曼聯每場賽事，完全熟晒對手打法，上任後準備工夫做得最好就係今場喎。

曼聯粉絲就剛收到本季最振奮人心嘅消息，世界級中場桑馬達來投後有望解決球隊近年中場創造力不足嘅問題，呢位西班牙猛將今戰可以候命，教頭莫耶斯話佢狀態唔錯，會安排佢正選落場。不過，無論佢係正選定後備，都會成為各界焦點。而朗尼、尹佩斯及費蘭尼其實已經傷愈復操，隨時可以上陣，如果佢哋可以落場，「魔粉」就可以體驗吓呢個新攻擊組合啲威力。不過，曼聯最大隱憂係防線，重心尼曼查維迪停賽，後面仍然震過貓王。
卡迪夫城唔玩死守

卡迪夫城今場仲有箭頭費沙甘保、中場伊克林及麥斯達利都係倒戈出戰，前者首循環已於主場射破過曼聯大門，呢班失意奧脫福嘅暗星對住舊會當然會加二錢肉緊嚟證明自己，小將麥斯達利剛於足總盃後備落場都幾搶鏡，唔可以睇小佢！

另外，「卡城」呢班波嘅特性係遇強唔會死守，早前作客曼城雖然輸2比4，但有「吉士」同對手鬥攻，今仗作客亦唔會赦曼聯，故大手交易機會甚高。