利雲特細頂巴塞

猪拉多纳

兩軍交鋒大細單跳有路跟

今晚西盃8強次回合尾場，巴塞隆拿喺主場迎戰「小蝙蝠」利雲特。呢場係雙方今個月第3度交鋒，巴塞近期有會長羅素爾辭職，主力美斯、丹尼爾都捲入離隊風波，依家揸住3球優勢，嚟緊聯賽又要硬撼「蝙蝠兵團」華倫西亞，有後顧之下留力唔奇，加上佢哋近期對賽大細旺單跳，今仗細盤有逾兩倍不容錯過。

（now 632周四清晨5時直播）

首回合巴塞憑住小將基斯甸泰路大演帽子戲法，作客以4比1反勝利雲特，一洗早前聯賽造訪「小蝙蝠」和波失分嘅頹風。由於巴塞遙遙領先，令今仗變成例行公事，佢哋下仗聯賽要火併華倫西亞，主帥馬天奴收起多名主力唔奇，好似因傷抖咗好耐嘅荷蘭翼鋒阿費利，上仗對馬拉加完場前亦有得踢幾分鐘，今仗隨時有得擔正。
巴塞軍心不穩炒唔起

上周巴塞會長羅素爾因為收購尼馬條數唔清唔楚，喺龐大壓力下宣布辭職，隨即傳出王牌美斯嘅老竇與聖日耳門密會嘅消息，想斟佢過檔，連右閘丹尼爾亦唔打算同球隊續約，捱到2015年合約到期以自由身走人，對內部點都有影響。

利雲特自知無力收復失地，迅速將集中力放番喺聯賽度，上仗全力出擊，幾經辛苦之下作客反勝西維爾，成班波搏得好盡，邊有咁快回得切氣，今仗hea踢都似。睇番兩軍近五次交手，入球大細呈現單跳(見附表)，上仗大勝過後，按照攤路，今仗開細機會極高，入球細有2.25倍咁筍，非常值博。