羅馬醒里開工利是

猪拉多纳

意大利盃4強首回合「天助」羅馬！由於大雨關係，羅馬上周日聯賽踢唔夠10分鐘就腰斬，球員可以慳番啖氣，今仗主場全力撲擊拿玻里。以呢支首都勁旅今季主場13戰11勝2和亮麗戰績，無懼任何對手來犯。反觀拿玻里愈踢愈沉，剛慘吞阿特蘭大3蛋，嚴重打擊士氣，抵擋唔住羅馬強攻，Mic少簡單捧主勝。

（now 633及660周四凌晨3時45分直播）

羅馬奪取意甲冠軍機會已愈來愈低，可以疊埋心水爭意盃，佢哋上圈力挫勁敵祖雲達斯，充分凸顯爭標強大決心。最重要係球隊狀態當勇，已連贏5場，拿積、謝雲奴、迪斯度、托迪等中前場球員，個個都有上乘數胡能力，首循環聯賽就以2比0輕取拿玻里，更何況客軍現時陷入低谷，羅馬勝算自然更高，尤其是首回合要把握地利優勢，盡量贏多幾球，令拿玻里冇得翻身。
拿玻里疲兵作客難抗

拿玻里冇晒上半季銳氣，近4仗僅1勝，呢場勝仗來自上周中意盃贏拉素1比0。當時球隊付出九牛二虎之力先至險勝，難怪教練賓尼迪斯被迫上仗聯賽畀部分主力休息，結果慘敗畀阿特蘭大，暴露後備兵力不足弱點，經唔起頻密賽程考驗。拿玻里匆匆再戰，而且對手係實力強橫、養精蓄銳嘅羅馬，恐怕要再次束手就擒。