失意歐聯曼城搵史篤城出氣

猪拉多纳

曼城周中歐聯畀巴塞隆拿技術性擊倒，落後0比2次回合去魯營唔係仲妄想反先呀？不如疊埋心水踢好國內賽事好過啦，今晚球隊英超賽程編排唔錯，又主場，仲要對住弱旅史篤城，係球隊重回正軌嘅最好機會，喺歐洲曼城就差咁截啫，返到英超確係超啲嘅，今場「讓球主客和」讓兩球，照捧讓球主勝！
史篤城作客曳

未講波之前，睇吓今日大埔Lulu着乜衫先，佢出名着乜衰乜，燈味十足，不過，啱啱過去嘅歐聯，Lulu喺網上畀料四場全中，着乜中乜，今日佢着曼城喎，順住條水捧曼城先。

有睇周中歐聯曼城對巴塞嘅球迷，都應該睇到曼城出到歐洲始終差啲，唔係淨係呢場，歐聯分組賽第二戰主場對拜仁慕尼黑，一樣畀拜仁以3比1技術性擊倒，錢，真係唔係萬能嘅。不過，曼城嘅實力返到英超就真係可以也文也武嘅，一般球隊作客要搶分真係難過登天，曼城既然歐洲賽唔掂，相信會專心國內聯賽搶分同爭盃賽冠軍。

今日曼城對手史篤城又確係幫唔落，聯賽作客1勝3和9負，踢到「成篤屎」咁，唔好話對曼城，嚟香港作客對傑志都未必搶到分啦，咁蹺曼城近三次主場對住史篤城都贏3比0，所以今場讓球主勝好路呀。
now 621周六晚11點直播