荀盤益你 : 綠駿之威打疊搏

不死鸟

近排斑尼唔止一次喺專欄提供葉廐馬，雖然來來去去都話呢個馬房當旺，但總之唔使理咁多，對上四次貼嘅「錢會來」、「紅日」、「大家興旺」、「葵扇煙」全部贏晒，賭錢最緊要信邪，今次要揀番隻同大家研究吓。

　　第四場四班千八米，七歲馬「綠駿之威」今季頭五戰全輸，由五十二分減至四十七分後，第六仗即喺谷草一哩反彈，至今六戰共得一冠兩亞兩季同埋一席第五，就知季初冇表現係刻意安排，而唔係實力退化。你可能會話老馬連搏多仗，今仗排七檔負一三○磅兼對手轉強，形勢似乎唔多樂觀，但其實諗深一層，好少馬可以喺四日內連贏兩場，計落新勝嘅「吉祥三寶」、「廣友名駒」未必能順利再贏﹔至於體力方面，斑尼經常指出「綠駿之威」同父馬特別鍾意連珠炮發，如「大家平安」、「玉蜻蜓」同「有景」等全都試過打疊上名，「綠駿之威」前季更曾喺谷草連贏兩場，就知今次必打鐵趁熱繼續搏殺。

　　翻查紀錄，「綠駿之威」有三次頭馬係?出王牌報名場次取得，今次葉楚航又用呢招之餘，續配贏馬拍檔賴維銘亦唔會三心兩意，當然唔可以睇小。

　　今日提供一場早波畀大家，心水係日職神戶勝利船。呢隊波暫時排聯賽第十三，但其實主場成績唔差，至今四戰共得三勝一負，當中共入八球，證明火力十足。

神戶勝利船贏面大

　　最重要係神戶勝利船曾喺主場贏前列分子大阪飛腳三比一，呢次面對升班馬山形山神，級數上略秤先之餘，兩隊曾於○六年四度喺日乙交手，結果勝利船錄得兩勝兩和，讓球盤開主隊讓平半，梗係捧主勝。