見招拆招：馬威力無懼排外檔

不死鸟

自四月廿六日女皇盃賽日開始，最近三次賽事均在沙田馬場舉行，要到明晚才恢復谷草夜賽。根據筆者以往的經驗，每當谷草夜賽暫停一段長時間之後，再跑番谷草就會連場爆冷，所以今戰選馬真係宜冷忌熱。

　　第三場四班千二米，「金百利」今季先後兩捷於谷草千二米，在楊明綸胯下亦能夠贏出，已經證明響四班肯定係上風馬。其後兩仗出爭谷草一千米表現欠佳，一次係抽到不利嘅大外檔起步，全程走外叠蝕位之下唔輸就奇﹔另一次則配季內只贏過兩場頭馬嘅魯柏軒，欠表現都可以理解。不過，前仗「金百利」出爭田草一千米跑獲亞軍，僅以乘多輸畀「喜盛龍」，再次證明係有實力之馬，今仗改配最強七磅仔蔡明紹上陣，加埋三檔之利，有力重開勝門。

　　第四場四班千八米，「馬威力」上仗在同程跑獲亞軍，僅以頸位不敵「綠駿之威」，鞍上人梁家俊嘅發揮已算出色。今仗改配蔡明紹上陣，畢竟騎者有較多騎放頭馬嘅經驗，對克服十二檔應有一定幫助，而且「馬威力」呢匹團體馬近兩季均未贏過，鬥志必定鮮明。今次同場對手實力未算太強，「馬威力」既集有利條件於一身嘅情況下，應可贏番一仗，排外檔會換來賠率，值得一博。