魯賓卡山寒戰殺迪

猪拉多纳

今晚咁多場歐霸盃32強次回合，阿King都搵到好嘢，其中係早場魯賓卡山主場對貝迪斯，今屆貝迪斯多線發展，搞到依家於聯賽包緊尾，今晚仲要遠征天氣嚴寒嘅俄羅斯，實凍到班球員騰騰震，主W乃不二之選。

（有線64及203台周五凌晨1時直播）

今屆貝迪斯都幾重視歐霸，無奈兵源緊絀，順利殺入淘汰階段嘅同時，喺聯賽就連戰連敗，為救亡先後炒咗梅爾同加列度兩名主帥，但實情係愈換愈衰，新帥卡達朗上任六仗輸咗四場，日前聯賽輸畀畢爾包，又有柏基斯及羅倫素雷耶斯被逐，講體力都輸蝕晒。

魯賓卡山喺首回合作客長時間打少個嘅劣勢下，依然追成1比1，佢哋主場俄羅斯喀山嘅氣溫得攝氏零度以下，疲態畢露嘅貝軍隨時凍到變雪條，梗係捧以逸待勞嘅魯賓卡山。
拿玻里聖羅倫素同吼讓主

另一場歐霸重頭戲拿玻里主場對史雲斯，拿軍主帥賓尼迪斯出名盃賽專家，聯賽爭標渺茫，今場一定強陣出擊搏甩髀向老闆交代，不妨直取讓球主勝。

（有線61、64、201及203台周五凌晨2時直播）

南美自由盃方面，阿根廷聖羅倫素首仗輸波，今返主場出戰厄瓜多爾嘅迪華利獨立隊不容再失，事實上聖軍近三場聯賽贏晒極速反彈，對住作客腳軟嘅迪華利獨立隊，讓球主勝值博。