魔鬼隊富咸唔赦殘陣少林隊

猪拉多纳

電影《少林足球》入面，少林隊每位師兄弟都身懷絕技，「紐卡素版」嘅少林隊亦如是，不過今場作客對住由「魔鬼教頭」馬加夫領軍嘅富咸，冇咗「鐵頭功」柏杜呢位大師兄領導球隊，又冇二師兄「旅風地堂腿」迪保治嘅掃蕩，更冇埋五師弟「大力金剛腿」雷米嘅超強射門，今場都係讓唔起魔鬼隊富咸，捧讓球主勝！
紐卡素幾師兄弟缺陣

紐卡素大師兄領隊柏杜上場對侯城施展「鐵頭功」襲擊對方球員，結果被罰停賽7場，今場開始坐波監，賽前佢話要上堂學吓控制情緒，又多謝老細艾殊利冇因此事而炒佢。大師兄，好彩艾殊利間公司上年盈利增加近倍，高達2.564億鎊（約33億港元），所以先冇同你算帳！

紐卡素冇咗大師兄柏杜之外，最大問題係冇咗二師兄迪保治同五師弟雷米，右閘迪保治貴為法國隊正選右閘，當然甚具級數，佢唔單止防守穩健、速度高，更有極強助攻意識，至於隊中神射手雷米則射門技術到家，埋門觸覺敏銳，今場呢兩員攻守大將皆因傷缺陣，對紐卡素影響極大，益晒「魔鬼教頭」馬加夫帶領嘅富咸，呢支包尾大幡上場喺護級大戰輸畀卡迪夫城，今場不容有失，受讓值捧。
now 622周六晚11時直播